స్వాతంత్ర్యం అంటే ఏమిటి?

స్వాతంత్ర్యం! అందరికీ చాలా ఇష్టమైన పదం. ఇంగ్లిష్ లో ఫ్రీడం అనే పదానికి తెలుగు అర్ధం స్వేచ్చ. ఈ రెండు పదాల అర్ధం వేరు. వాటి పర్యవసానం కూడా వేరు.

 

స్వేచ్చ అనే పదానికి అర్ధం స్వ + ఇచ్ఛ = నాకు నచ్చింది చేస్తాను. ఇందులో నిర్ణయం అనేంత ఏమీ లేదు. చాలా సాధారణ పరిస్థితుల్లో మాత్రమే ఉపయోగించదగ్గ పదం.

 

స్వాతంత్ర్యం అనే పదానికి అర్దం స్వ + తంత్రం = నా నిర్ణయం నేను తీసుకునే శక్తి కలిగి ఉంటాను/ఉన్నాను అని. ఇది నిజంగా మంచిదేనా? జవాబు - అడిగిన వ్యక్తి పరిణతి పైనా, జవాబు చెప్పే వ్యక్తి బాద్యత / పరిణతి పైనా ఆధారపడుతుంది. మూడు సంవత్సరాల కుర్రవాడు నేను నాకు నచ్చిన తిండి తినటం స్వేచ్చ అంటే ఒక పూటకి ఫరవాలేదు. ప్రతి పూట అలా చేస్తే వాడి ఆరోగ్యం పాడుచేసిన వాళ్ళం అవుతాం కదా. అందుకే అప్పుడప్పుడు స్వేచ్ఛ ఇవ్వాలి. స్వాతంత్ర్యం ఇవ్వటానికి ముందు వాళ్ళకు పరిణతి కావాలి.

 

తాను ఏ చదువు చడవాలో నిర్ణయించుకునే అవకాశం పిల్లకు ఇవ్వటం స్వాతంత్ర్యం. తన జీవితం పట్ల బాధ్యత ఉన్న విధ్యార్ధికి ఈ స్వాతంత్ర్యం ఎప్పుడూ మేలు చేస్తుంది. చాపల్యం ఇంకా పోకముందు అదే నిర్ణయం వాళ్ళు తీసుకుంటే వాళ్ళకు హాని కలుగుతుంది.

 

పరిణతి అనేది అందరికీ ఒకే వయసులో రాదు. ప్రతి వ్యక్తికి ఈ ప్రక్రియ భిన్నంగా ఉంటుంది. అందుకే స్వాతంత్ర్యం ఇవ్వాలా లేదా అనే నిర్ణయం తల్లిదండ్రులకు వదిలిపెట్టాలి అని నా అభిప్రాయం. ఎందుకంటే మన మంచి కోరుకునే వాళ్ళలో మొదటి వరుసలో వారే ఉంటారు కనుక. వాళ్ళ జీవితం లో సింహభాగం పిల్లల భవిష్యత్తు కోసం ఖర్చు చేస్తారు కనుక.

 

వారు తమ భయం చేత పిల్లల భవిష్యత్తుకి అడ్డంకి గా కూడా మారే అవకాశం లేకపోలేదు. ఐతే తల్లిదండ్రులకు ఈ విషయంలో వారి భయాలను ఎరుకలో ఉంచుకుని పిల్లల పరిణతిని నిర్ణయించే మానసిక శిక్షణ అవసరం. పిల్లలకు ఆ నిర్ణయం తీసుకునే స్వాతంత్ర్యం ఇవ్వటం మాత్రం అనివార్యం. ఎందుకంటే వారి జీవితం చివరి వరకూ మనం బ్రతకం కనుక.

 

పిల్లలకు నిర్ణయాధికారం ఎంత త్వరగా ఇవ్వగలిగితే అంత మంచిది. దీనికి రెండు కారణాలు. ఒకటి, కొన్ని తప్పటడుగులు వేసినా వారికి సరిదిద్దుకునే అవకాశం ఉంటుంది. రెండు, ఏ కారణం వల్లైనా తల్లిదండ్రులు పిల్లలకు దూరమయ్యే పరిస్తితి ఏర్పడినా వారు తమ జీవితాన్ని సజావుగా నడుపుకునే సామర్ధ్యం కలిగి ఉండటం మంచిది.

 

పిల్లలకు నిర్ణయాధికారం ఇచ్చిన కొత్తలో తప్పులు చేస్తారు. ఇది వారికి నిర్ణయాధికారాన్ని ఇవ్వకుండా ఉంచే అడ్డంకి. జీవితం పెర్ఫెక్ట్ గా ఉండదు. మనం ఎంతగా ఆలోచించి తీసుకున్న నిర్ణయం ఐనా కొన్నాళ్ళ తరువాత తప్పుగా తోచవచ్చు. జీవితం లో జరిగిపోయిన విషయాల గురించి ఎప్పుడూ విచారించకూడదు. ఇదివరకు జరిగిన ప్రతి సన్నివేశం గుర్తుంచుకోవటం మంచిదే. కానీ దానికి ఎమోషన్ కలిపి ఉంచకూడదు.

సద్గురు జగ్గి వాసుదేవ్ చెప్పినట్టు, మన ఆలోచనల్లో అధిక శాతం - గతం లో జరిగిపోయిన సంఘటనలకు సంబంధించి ఐనా ఉంటాయి, లేదా భవిష్యత్తుకు సంబంధించి అయినా ఉంటాయి. ప్రస్తుత పరిస్తితుల గురించి ఆలోచన కంటే అవగాహన ఎక్కువ సహకరిస్తుంది. ఈ విషయం మనకు ఇప్పటివరకు ఉన్న ఆలోచనా సరళికి పూర్తి విరుధ్ధంగా ఉండవచ్చు. అంత మాత్రాన కొట్టి పారెయ్యకండి. ఆలోచించండి. ఇది సత్యం.

 

మీరు ఆలోచించే సమయం మీ అంచనా కంటే చాలా ఎక్కువ. మన ఎరుకలో లేకుండా మనం చాలా ఆలోచిస్తాం. మనం చూసే ప్రతి విషయం, వినే ప్రతి అంశం మన ఆలోచనలను ప్రభావితం చేస్తూనే ఉంటుంది. మనం ఎదురుపడే ప్రతి వ్యక్తి పైనా, వస్తువు పైనా, ఒక అభిప్రాయం ఏర్పరచుకుంటూ పోతుంటాం. ఆ అభిప్రాయం సరైనదే అని ఖచ్చితంగా చెప్పలేము. ఎందుకంటే మన మనసు వేగం పరిసరాలను అవగాహన చేసుకుని తగినట్టు స్పందించేందుకు రూపుదిద్దుకుంది. దీనికి ఖచ్చితత్వం కంటే వేగమే ముఖ్యం. ఇది సహజ జీవన పరిస్తితుల్లో చాలా అవసరం. నేటి నాగరిక సమాజంలో ఇది చాలా చిక్కులు తెస్తుంది. ఇప్పుడు ప్రతి పని ఖచ్చితత్వంతో చెయ్యాలని మన విద్యావిధానం మనకు నేర్పించింది. మనసు మాత్రం అందుకు సరిపడేంత ఖచ్చితత్వం సంతరించుకోలేదు. దీన్ని అర్ధం చేసుకోకుండా మన నిర్ణయాలు ఖచ్చితంగా ఉండాలని ఆశించటం ఒక రకమైన అమాయకత్వం. ఈ ఎక్స్పెక్టేషన్ వల్ల ప్రతి చిన్న అలజడినీ పెద్ద కల్లోలం లా చూస్తూ మనం సఫర్ అవుతున్నాము.

యాంత్రిక యుగంలో ఖచ్చితత్వం అనివార్యం. ఇది ఫిజిక్స్ కి సంబంధించిన ఎక్స్పెక్టేషన్. ఫిజిక్స్ లా ప్రకారం ప్రపంచంలో చాలా విషయాలు ప్రతిసారి అవే రిజల్ట్స్ ఇస్తాయి. ఇది మానసిక పరిధికి వర్తింపజేసే ప్రయత్నం చెయ్యకూడదు. మనసుకు సంబంధించినంత వరకు, నిర్ణయం ఏక్సెప్టబుల్ పరిధిలో ఉంటే చాలు. ప్రిసిషన్ అవసరం లేదు. ఎందుకు అంటే మనసు ఫిజిక్స్ కంటే చాలా సంక్లిష్టమైన టెరేన్. అందులో చాలా వేరియబుల్స్ ఉంటాయి. ఇంకో ముఖ్యమైన విషయం ఏమిటంటే - జీవితం అంటే ఒక జాబ్, కుటుంబం, బాధ్యతలు, బంధాలు కాదు. ఇవన్నీ ఉంటే చూడ్డానికి బాగుండొచ్చు. కానీ, వాటి కోసం జీవితం కుదువపెట్టవలసి వస్తే జీవితం విలువని మనం తక్కువ గా అంచనా వేసినట్టే. టెక్నాలజీ రాక ముందు మనిషి బ్రతికాడు. కొంత కష్టపడి ఉండొచ్చు, కానీ జీవితం మొత్తం కష్టమే నిండి ఉండదు. టెక్నాలజీ లేకపోయినా మనిషి బ్రతకవచ్చు. ఇది చాలా మందికి నచ్చని వాక్యం. కానీ పూర్తిగా నిజం. ఐఫోన్ లేకపోయినా కడుపు నింపుకోవచ్చు. కాకపోతే పీర్ ప్రెషర్ వల్ల ఐఫోన్ లేకపోతే జీవితం ఫుల్ఫిల్ కానట్టు ఆలోచించటం సరైన విధానం కాదు. సంతోషంగా జీవించటం ముఖ్యం. విలాసం అవసరం కాదు. ఆ విషయం గుర్తిస్తే, మన పిల్లలు ఆ మాత్రం బ్రతకటం చేతకాని వాళ్ళు కాదు.

స్వాతంత్ర్యం అంటే  కోరుకున్నది చెయ్యగలగటం కాదు. ఏది అవసరమో గుర్తించి అవసరమైనది చెయ్యగలగటం. స్వేచ్ఛ అంటే కోరుకున్నది పొందటం. కానీ అలాంటి స్వేచ్ఛ భవిష్యత్తుకి అవరోధం కానంతవరకు, శృతి మించనంత వరకు, ఇతరులకు ఇబ్బంది కానంతవరకు ఫరవాలేదు.