నా మెయిలు లో తెలుగు వెలిగిపోతుంటేను

 నా మెయిలు లో తెలుగు వెలిగిపోతుంటేను...

తెలుగు వెలుగులు దిగంతాలు దాటేను ...

 

నా కలలు నిక్కముగ చూసుకుంటున్నా...

తెలుగు తల్లి పదముల మొక్కి, బాసలు చేసుకుంటున్నా..

 

తెలుగు లో ఈ మెయిలు వ్రాసుకుంటున్నా....

 

లాలి పాటల తెలుగు       పొలము పాటల తెలుగు

చదువు సంధ్యల తెలుగు       శౌర్య చేతన తెలుగు

మదికి సాంత్వన తెలుగు       మధుర లాలన తెలుగు

మరులు గొల్పెడు తెలుగు     మమత తెలుగు

రత్నాలు పొదిగిన తెలుగు రాచ తెలుగు

కృష్ణ రాయల కీర్తి గాంచె తెలుగు

రవి చెందురుల ఆయువున్న తెలుగు

కవి త్రయము కూర్చిన భారతము తెలుగు

అన్నమాచార్యుని పదము తెలుగు

త్యాగరాయుని కృతుల సిరులు తెలుగు

పోతన్న భాగవతము కాంచిన వెలుగు

శ్రీనాధ ప్రబంధముల మెరిసె జిలుగు

కీర్తించ లేనంత వరము తెలుగు

మాటే తానైన మమత తెలుగు

  

కవితలూరు తెలుగు కమ్మదనము

విరుల ఝరుల తెలుగు సౌరభమ్ము

 

పాల మీగడ తెలుగు    తేనె తీపియు తెలుగు

గోదావరీ నీళ్ళ     గల గలలు తెలుగు

 

విన సొంపగు విజ్ఞాన కోశము తెలుగు

రాచ మర్యాదలు పొందు రాచ తెలుగు

 

ఇంకా కవితా ఝారి వరద లా పొంగుకొస్తోంది...

కానీ ఈ వరద మీ కంప్యూటర్లని ముంచేస్తుందేమో అని...

నాగార్జున సాగర్ అంత ఆనకట్ట వేసి ఆపుకున్నా..

 

నా తెలుగుని ఇలా జగద్విఖ్యాతం చేసిన జిమెయిల్ టీం మరియు గూగుల్ సంస్థకు నా హృదయపూర్వక ధన్యవాదములు

 

ఏంటో... ఇదంతా చదివి మీరు ఏమయిపోతారో అని బెంగ గా వుంది :)

తిరుగు టపా త్వరగా పంపితే చదివి సంతోషిస్తాం ;)

మర్చిపోవద్దు... తెలుగు లో వ్రాయండి....

 

ప్రేమ తో,

మీ

వంశీ కుంచాల

ఇది వ్రాసి చాలా ఏళ్ళయ్యింది. జిమెయిల్ లో తెలుగు మొదలయిన రోజులవి (ఏప్రిల్ 2009)

అప్పటి నుండి అనుకుంటే ఇప్పటికి నా బ్లాగుకు ఒక రూపం వచ్చింది.